GUIMARAS – Nagpasalamat ang Probinsya sang Guimaras matapos nagpaathag ang Department of Health sa paglakip sa ila lugar sa mga may nagpositibo sa Coronavirus disease 2019 (Covid-19).
Nahibaluan nga nagpagwa sang resulta ang Department of Health sa diin ang isa ka seafarer nga na-stranded sa Manila kag nag-abot sa Iloilo sang damlang lang ang ila ginmarkahan nga si WV72, 27 anyos tumandok sang Buenavista, Guimaras.
Sa exclusive interview sang Bombo Radyo kay Guimaras Vice Gov Atty. John Edward Gando, iya ginpahayag nga sa una nag-ibwal siya bangud nga ginpagwa nga may nagpositibo sa Covid-19 sa Guimaras apisar nga wala nakatapak sa isla si WV72 humalin sang ginpaidalom siya sa 14 day quarantine period.
Apang sa ulihi, gin-athag sang ahensya nga si WV72 ang tumandok lang sang Buenavista, Guimaras kag isa ka repatriate sa diin wala na ginlakip ang pangalan sini sa mga nagpositibo sa isla kag sa baylo ang address lang sini ang ginbutang sa listahan.
Sa subong nagapabilin sa gihapon nga Covid-19 free ang isla kun local transmission ang paga istoryahan bangud wala man na acquire ni WV72 ang virus sa Guimaras.
Nahibaluan nga epektibo na ang General Community Quarantine (GCQ) sa Probinsya sang Guimaras.
Ang pagpaidalom sa Guimaras sa General Community Quarantine ang santo sa mando sang National Inter-Agency Task Force for the Management of Emerging Infectious Disease (IATF-EID).
Suno kay Gando, ginpirmahan na ni Guimaras Gov. Dr. Samuel T. Gumarin ang Executive Order No. 44 nga nagapatuman sang Level 2 Response santo sa Covid-19 Response Initiative.
Balik naman sa pagbyahe ang mga sakayang pandagat umpisa las 6:00 sang aga tubtub las 4:00 sang hapon apang dapat nga ang Ro-Ro wharf, Jordan kag Buenavista lang ang gamiton bilang ports of entry sa Guimaras.
Samtang ang Puyo Wharf sa Nueva Valencia naman ang buksan para sa mga cargoes kag delivery sang produkto halin sa gwa sang Guimaras.
Apang ang mga ‘returning residents’ naman halin sa Iloilo kag magapauli sa Guimaras ang nagakadapat nga magpaidalom sa 14 day quarantine period.
Ang mga ‘non-residents’ naman sang Guimaras ang pasugtan nga makasulod sa isla kun ang ila nga katuyuan amo ang pag transport sang basic commodities and necessities; emergency cases; kag meritorious cases.
Hatagan naman sang inbound pass ang mga non-residents nga magasulod sa Guimaras.
Ang outbound travels sang Guimarasnon ang limitado lang sa medical referrals, emergency cases kag meritorius cases nga aprubado sang Provincial Government sa diin nagakadapat nga magpakita ang mga ini sang valid ID kag Outbound/Quarantine Pass.
Sa mga non-residents nga magabiya sa isla, ang pasugtan lang nga makahalin amo ang may mga Outbound Pass.
Pasugtan naman nga magwa sulod sa isla ang mga nagatrabaho sa law enforcement agencies nga nagahatag sang serbisyo sa Guimaras, nagahatag sang essential kag professional services kag iban pa nga government employees nga ginapahanugutan sang Provincial Government.
