ILOILO – Ginaduso ni Iloilo 3rd District Congressman Lorenz Defensor ang hagna para sa pag-edukar sa mga drivers sa mga impormasyon nga adlaw-adlaw nila nga ginakinahanglan agud malikawan ang mga aksidente sa dalan.
Ini ang ginatawag nga House Bill 3196 ukon ang Driver Mandatory Seminar.
Sa interview sang Bombo Radyo kay Defensor, iya ginpahayag nga indi mabug-at ang apat tubtob lima ka oras sang pagpamati sang mga drivers sa lecture nga magapahanudom sa ila sang traffic signs, road warnings, kag mga regulasyon sang Land Transportation Office (LTO).
Suno kay Defensor, ini nga mga inoras ang mas manubo ipaanggid sa iban nga pungsod sa diin nagalab-ot ini sang masobra 30 ka oras sa pagpamati lang sang lecture.
Importante suno kay Defensor nga mapatuman ini sang gobyerno, kag importante man nga pakigbahinan ini sang publiko.
Ini ang mas maayo suno kay Defensor ilabi na kon himuon ini nga libre lang.
Dugang pa ni Defensor, tuman na kadamo sang aksidente nga nagakatabo sa dalanon, sa diin santu sa record sang Philippine Statistics Authority, nagalab-ot sa 12, 000 ka tawo ang nagakapatay kada tuig sa bilog nga pungsod.
