Kilalahon ang Pinay weightlifter nga si Hidilyn Diaz sa Philippine Sportswriters Association (PSA) Hall of Fame kadungan sang tuigan nga Awards Night sa Enero 27.
Ihatag kay Diaz ang pasidungog kasunod ang iya silver medal sa 2016 Rio Olympics kag ang maragtason nga Olympic gold medal sa Tokyo Olympics nga nadag-an sini sang 2021.
Ang bulawan nga medalya nga iya nakuha amo ang labing-una nga bulawan nga medalya sang Pilipinas sa Olympiada antes ini nasundan sang duha ka gold medals ni Carlos Yulo sa gymnastics sang 2024.
Magluwas sa iya kadalag-an sa Summer Games, nadag-an ni Diaz ang nagkalain-lain nga international tournaments nga amo ang nagbutang sa iya sa posisyon nga nagakabagay sa Hall of Fame.
Nahibaluan nga apat ka beses man nga nahingadlan si Diaz bilang PSA Athlete of the Year (2016, 2018, 2021, 2022).
Bangud sini nga bag-o nga pagkilala, makaupod na sini sa Hall of Fame sanday eight-division boxing champ Manny Pacquiao, world-class bowlers Paeng Nepomuceno kag Bong Coo, chess grandmaster Eugene Torre, pool icon Efren ‘Bata’ Reyes, kag late FIDE president Florencio Campomanes, kag ang late trackster Lydia De Vega.
