ILOILO CITY – Nagapangatubang sang kaso nga unjust vexation kag oral defamation ang isa ka maestro matapos ginbyuyayaw kag nagpangtiklod sang isa ka pulis sa Q. Abeto Street Mandurriao Iloilo City.
Ang suspek amo si Mario Hector Calambro, 54, Technology and Livelihood Education (TLE) teacher sa Mandurriao National High School.
Samtang ang biktima naman nga pulis amo si Police Corporal Frank Sanchez 29, assign Regional Community Development Commission sang Police Regional Office VI.
Suno kay Sanchez, naghalin ini sa Syudad sang Iloilo kag pauli na kuntani sa banwa sang San Miguel Iloilo sakay sang iya motorsiklo.
Apang pag abot sini sa Q. Abeto Street Mandurriao Iloilo City, ginbusinahan ini sang maestro.
Sang nagpahigad ang pulis, diri na kag ginbuyayaw ini sang maestro.
Sang nagpanaog na si Sanchez sa iya motorsiklo, nagpakilala ini nga pulis.
Apang ginsabat ini sang maestro nga wala ini sang labot kun pulis ang iya kaistorya kadungan sang pagpahog nga siya pa ang maaresto sa biktima.
Diri na kag gin aresto sang pulis ang maestro kag ginpa preso sa Mandurriao Police Station.
Sang gindala sa Mandurriao Police Station ang maestro, nagpaandam pa ini sa pulis nga iya pasakaan sang kaso.
