ILOILO CITY– Ginbasura sang chairman sang Committee on Transportation sa Iloilo City Council ang hingyo sang mga transport groups nga temporaryo nga untaton ang operasyon sang transport hub sa Iloilo Business Park.
Sa interview sang Bombo Radyo kay Iloilo City Councilor Rommel Duron, iya ginpahayag nga antes siya naghimo sang committee report sa ginpatigayon nga committee hearing sang Hulyo 31, 2019 agud istoryahan ang isyu sa Point-to-Point buses kag transport hub, nangayo anay ini sang opinyon sang Legal Office kun valid ang pagpasar sang franchise sang transport hub.
Suno kay Duron, wala sang problema ang pag-award sang nasambit nga franchise, santo sa sabat sang Legal Office.
Ginpanindugan man ni Duron nga indi makadugang sa problema sa trapiko sa syudad ang Point to Point buses bangud may gintalana man nga oras ang pagbyahe sang ila unit kag sa national roads man magaagi ang mga ini ukon sa Senator Benigno Aquino Jr.Avenue,Mandurriao.
Ginhangkat man ni Duron ang sin-o man nga indi kumbinsido sa resulta sang committee report nga magpadulong nalang sa korte agud didto magreklamo.
