Indi lamang mga nagabaligya sang karne nga halin sa backyard slaughter ang posible nga mapanabat, kundi pati ang mga konsumidor nga nagabakal sini, sa ginaduso nga ordinansa sang Iloilo City Government batok sa ilegal nga pag-ihaw sang kasapatan.
Ini ang ginatutukan sa regular nga meeting ni City Councilor Mandrei Malabor upod sa City Administrator, kag City Veterinarian’s Office agud mapanubo ang padayon nga paglapas sa mga regulasyon sa pag-ihaw sang karne sa siyudad.
Ang “hot meat” amo ang mga produkto sang karne nga naghalin sa unregistered ukon unaccredited nga mga slaughterhouse kag wala nakaagi sa kinahanglaon nga government health inspections.
Suno kay Dr. Fernando Abulencia, Iloilo City Veterinarian, bisan may mga operation kag confiscation na sang karne, nagabalik-balik gihapon ang mga paglapas bangud wala sang klaro nga penalties ukon probisyon ang existing nga Executive Order.
Lakip sa ginatutukan ang mga nagaihaw sang baboy sa backyard kag sa mga riverbank, nga posible man maapektuhan sang ginaduso nga ordinansa.
Tungod isa sa mga ginakabalak-an ang polusyon sa Iloilo River bangud sa mga ilegal nga aktibidad sa pag-ihaw.
Ginpahayag man niya nga nagakaubos ang manpower sang gobyerno sa padayon nga pag-inspeksyon, ilabi na sa mga roadside meat vendors.
May mga kaso man nga ginareport sa City Veterinarian’s Office, samtang ginapangabay ang publiko nga mag-report sa City Environment and Natural Resources Office (CENRO) kung may makita nga nagaihaw sang kasapatan sa backyard ukon sa higad sang suba.
Samtang, ang Local Economic and Enterprise Office (LEEO) ang nagapanguna sang operasyon kag administrasyon sang slaughterhouse, samtang ang City Veterinarian’s Office ang nagatutok sa regulatory functions pareho sang surveillance, inspection kag monitoring.
Base sa datos sang LEEO, naglab-ot sa 66,615 ka baboy, 773 ka baka kag 5,369 ka karbaw ang naihaw halin Enero tubtob Oktubre 13 subong nga tuig.
Text by: Bombo Cyrene A. Nasis
