Patigayunon ang hublag-protesta sa syudad sang Iloilo sa masunod nga Myerkules, Pebrero 25, kadungan sang ika-40 nga anibersaryo sang EDSA People Power Revolution.
Suno sa Kahublagan Kontra Kurapsyon (KKK) nga amo ang masangkad nga multi-sectoral alliance sang mga Ilonggo kontra kurapsyon, magatipon ang mga maga-upod sa protesta sa Iloilo Provincial Capitol 12:30 sa udto, kag pagasundan sang mga ambahanon kag mga speech.
2:30 sa hapon, maga-martsa ang protesters pakadto sa St. Clement’s Church, kag maga-diretso sa Jaro Plaza.
May naka-schedule naman nga misa sa Jaro Metropolitan Cathedral sa alas kuatro sa hapon.
Gina-engganyo sang KKK ang maga-upod sa protesta nga magsuksok sang puti nga panapton.
Sa press release sang grupo, ginsiling nga pagkatapos sang EDSA People Power Revolution sang 1986 kag EDSA 2 sang 2001, nagapabilin nga isa ka pagpanghangkat sa mga Pilipino nga gub-on ang garuk nga sistema sang pang-gobyerno nga puno sang kurapsyon.
Bangud sining dunot nga pamulitika suno sa grupo, nagsangkad pa ang gahum sang mga dinastiya kag nagasunod ang mga kaso sang plunder.
“The tradition of pillaging the public treasury continues unabated, with multi-billion peso infrastructure projects riddled with massive kickbacks and substandard results,” suno sa KKK.
Ginlaslasan man sini ang mahinay nga imbestigasyon sa mga ahensya sang gobyerno nga nagapakita nga may ginatabun-tabunan kag may selective accountability.
Ginapasabat sang grupo si President Ferdinand Marcos, Jr. nga amo suno sa ila ang responsable sa pork barrel system kun sa diin makabenepisyo man ang iya kaugalingon nga pamilya kag mga kaalyado sa pulitika.
Magluwas diri, ginapanawagan man sang KKK nga pasabton si Vice President Sara Duterte sa iya nga pag-abuso sa confidential funds.
“Fully stripping political dynasties of their power and exacting accountability from thieves in government will be seemingly impossible tasks as long as the reigning King and Queen of Corruption are not held liable through all possible means for their respective roles in national scandals that rocked the nation,” kabahin sang press release sang KKK.
Matandaan nga antes sini, may duha man ka nauna nga hugnat sang Trillion Peso March sa Iloilo nga gin-updan sang nagkalain-lain nga mga grupo, mga kabataan, mga propesyunal, kag mangin sang simbahan.
Natabo ini sang Septyembre 21 kag sang Nobyembre 30 nga ang panawagan nagsentro man sa pagtapna sa kurapsyon kag pagpapreso sa mga involved sa pagpangawat sa kaban sang gobyerno.#
