Ginbasura sang International Criminal Court (ICC) ang apelar ni former President Rodrigo Duterte nga baliskaron ang nauna nga desisyon nga ideklarar siya nga fit agud mag-atubang sa pre-trial proceedings sa iya kaso nga crime against humanity.
Subong nga hapon sang ginsapubliko sang pre-trial chamber ang desisyon sini nga nagasiling nga napaslawan ang kampo ni Duterte nga iplastar sang klaro kun ano gid ang ila nga gina-apelar.
Matandaan nga sang Enero 26 sang gin-reject sang ICC ang request sang kampo ni Duterte nga indefinite adjournment sa kaso.
Ginpanindugan sang ICC ang amo nga desisyon nga nagasiling nga makasarang pa si Duterte nga maghangop kun ano ang iya kaso kag makasarang pa nga magamit ang iya nga procedural rights.
Ang defense team naman sa pagpanguna ni Atty. Nicholas Kaufman ang nagsiling nga nagsalig lang ang Chamber sa independent panel sang tatlo ka medical experts kag wala na nagsapak sa medical reports nga ila ginpasa.
Ginklaro naman sang Chamber nga ginhatagan sini sang prayoridad ang reports halin sa neutral sources agud nga mangin patas ang proceedings.
“The Chamber’s reason not to rely on the Defence’s medical reports was to ensure that only information emanating from impartial and neutral sources was taken into consideration in order to ultimately ensure the fairness of the proceedings,” suno sa desisyon nga ginsulat ni Judge Iulia Motoc.
Gin-athag man sang korte nga ginrepaso man sang independent experts ang medical submissions sang defense antes sila nakalab-ot sa ila nga konklusyon nga fit pa si Duterte sa trial.
Sa separado naman nga desisyon nga ginsapubliko man subong nga adlaw, gin-aprubahan man sang ICC ang 500 ka dugang nga applicants nga magpartisipar sa proceedings bilang “drug war victims.”
Buot silingon sini, lab-ot na sa 539 ang numero sang mga biktima nga magapasakop sa confirmation stage.
Una na nga gin-anunsyo sang ICC nga gin-appoint bilang common legal representatives sang drug war victims ang duha ka Pilipino nga mga abogado nga sanday Atty. Joel Butuyan kag Atty. Gilbert Andres.#
