Nagpamalibad ang International Criminal Court-Office of the Prosecutor (ICC-OTP) sa pagkumpirma kun may yara na sang request nga magpaguwa sang arrest warrant batok kanday Senator Ronald “Bato” Dela Rosa kag Senador Christopher Lawrence “Bong” Go.
Ini matapos nga nalakip ang duha ka senador sa walo ka mga indibidwal nga ginhingadlan sang ICC nga co-perpetrators ni former President Rodrigo Duterte sa pagpatuman sang kontrobersyal kag maduguon nga drug war.
Kasunod sang pagguwa sang dokumento sang Sabado, nagpanawagan ang International Coalition for Human Rights in the Philippines (ICHRP) sa ICC nga ipaguwa na ang warrant of arrest batok sa co-perpetrators.
Suno naman sa OTP, nagapadayon pa ang ila nga imbestigasyon kaangot sa sitwasyon sa Pilipinas.
Indi pa sila makakomento suno sa ila sa tanan nga nagapadayon nga imbestigasyon kag sa specific nga mga kaso nga mahimo magtuhaw kaangot sa sini nga sitwasyon.
Importante ini suno sa ila agud nga maproteksyunan ang integridad sang imbestigasyon kag mapasiguro ang kahilwayan kag seguridad sang mga biktima, testigo, kag tanan nga mga indibidwal nga ginapakig-angutan sang prosecutor.
Nahibaluan nga magluwas kanday Dela Rosa kag Go, ginhingadlan man nga ginaalegar may kahilabtanan ang masunod:
Former PNP chief Vicente Danao
Ang nagtaliwan nga former PNP chief Camilo Cascolan
Former PNP chief Oscar Albayalde
Former National Bureau of Investigation (NBI) chief Dante Gierran
Former Philippine Drug Enforcement Agency chief Isidro Lapeña
kag former justice secretary Vitaliano Aguirre II
Una naman nga nagpahayag ang defense team ni Duterte sa pagpanguna ni Atty. Nicholas Kaufman nga wala pa sang arrest warrant sa sini nga mga indibidwal. Gintawag man ni Kaufman nga pamulitika ang pagpagwa sang listahan.#
