Gin-anunsyo sang Independent Commission for Infrastructure (ICI) nga ila na i-livestream ang mga ginapatigayon nga imbestigasyon tuhoy sa flood control projects umpisa sa masunod nga semana.
Ini ang ginkumpirmar ni Andres Reyes Jr. sa ginpatigayon nga organizational meeting sang Senate Committee on Justice and Human Rights nga ginpangunahan ni Senador Francis “Kiko” Pangilinan.
Gin-estoryahan sa nasambit nga sinapol ang Senate Bill No. 1215 nga nagatuyo nga maghimo sang isa ka Independent People’s Commission (IPC) agud magbusisi sa mga anomaliya sa tanan nga proyekto sang imprastruktura sang gobyerno.
Ginpabutyag naman Senador Pangilinan ang iya suporta sa desisyon kag nagpasalamat sa komisyon sa ila tikang nga paghatag sang transparency sa publiko.
Matandaan nga sang nagligad nga bulan, ginpahayag ni ICI Executive Director Brian Keith Hosaka nga indi nila anay pag-i-livestream ang mga hearing agud malikawan ang “trial by publicity” kag ang possible nga impluwensya sang pulitika sa proseso.
