Nag-request ang Iloilo City Police Office (ICPO) sang temporary signal jamming para sa nagahilapit nga Dinagyang Festival bilang kabahin sang ila security measures.
Sa interview sang Bombo Radyo, ginpahayag ni ICPO spokesperson Shiela Mae Sangrines nga nagpadala na sila sang sulat kay Mayor Raisa Treñas agud mangayo sang permiso para sa temporary nga signal jamming sa lugar kun diin hiwaton ang mga aktibidad sang Dinagyang.
Suno sa ICPO, tubtob sa karon wala pa sila sang nabaton nga pormal nga response ukon approval nahanungod sa amo nga request.
Ginapahayag nga ang signal jamming kabahin sang mga tikang agud masiguro ang seguridad sang publiko kag malikawan ang bisan ano nga major incident sa Dinagyang.
Ginpasalig man sang ICPO nga temporary lamang ang signal jamming kag pagkatapos sang mga aktibidad sang Dinagyang, ibalik man dayon ang signal.
Kada tuig, ginarequest man nila ini nga tikang bilang kabahin sang standard security requirements.
Lakip pa sa ginapatuman nga security measures amo ang bag checking, istrikto nga entrance kag exit points, kag padayon nga monitoring sang sitwasyon sa mga lugar nga pagahiwatan sang mga aktibidades.
