Padayon naman ang coordination sang Iloilo City Police Office (ICPO) sa nagkalain-lain nga ahensya may kaangtanan sa gina-renovate nga isa ka establisyemento sa distrito sang Arevalo nga nagresulta sa pag-hold sang walo ka persona.
Sa interview sang Bombo Radyo kay Police Major Sheila Mae Sangrines, Spokesperson sang ICPO, iya gin-athag nga gin-release sang Arevalo Police Station ang mga ginhold nga persona bangud wala sang balido nga rason para sa pag-isyu sang warrant.
Suno sa iya, ang pag-hold amo lamang ang kabahin sang verification process agud masiguro kun lehitimo ang ila presensya kag ang ila trabaho sa lugar.
Nagpanugyan man siya sa mga tag-iya sang establisyemento nga ihanda kag ipreparar ang ila mga legal nga dokumento, kag siguruhon nga ang mga transaksyon nga ginapatigayon amo man ang mga indibidwal nga ginahire.
Nagpanawagan man ang ICPO sa mga barangay officials nga mangin mabinantayon kag magbulig sa pag-check sang mga tawo nga naga-sulod sa ila tagsa ka mga barangay.
Samtang suno naman kay Police Captain Benjie Dicen, Officer-in-Charge sang Arevalo Police Station, iya ginpahayag nga naga-coordinate na ang kapulisan sa City Government agud mahibaluan kun may yara sang renovation building permit ang establisyemento.
Suno sa kapulisan, ongoing gihapon ang imbestigasyon kag padayon ang monitoring sang sitwasyon.
