ILOILO – Ginpaidalom sa lockdown epektibo kahapon nga adlaw, Agosto 12, ang Igbaras Municipal Police Station matapos nagpositibo sa COVID-19 ang isa ka police personnel.
Sa interview sang Bombo Radyo kay Iloilo Police Provincial Office Director Pol. Col. Paul Kenneth Lucas, iya ginpahayag nga isa ka 25 anyos nga patrolman ang nagpositibo kag nagapabilin nga asymptomatic.
Suno kay Lucas, Agosto 7 sang ginpaidalom sa swab test ang tanan nga pulis sa nasambit nga police station kag isa lang ang naggwa nga positibo.
Bangud sini, nagpadala ang Iloilo Police Provincial Office sang augmentation force nga amo ang magabulos sa ulubrahon sa checkpoints kag patrol sa banwa sang Igbaras.
Ipaidalom man liwat sa swab test ang tanan nga mga pulis gani subong, indi pa matumod kun san-o matapos ang lockdown.
Ang nagpositibo nga pulis ang ginapahayag nga nakapauli pa sa syudad sang Passi sang Agosto 3, gani nagapakig-angot man ang Igbaras Municipal Police Station kay Passi City Mayor Stephen Palmares agud matumod ang naka-close contact sang pulis kag mapaidalom man sa swab test.
