Nagsumpa na si Iloilo First District Board Member Carmelo Nochete bilang bag-o nga direktor sang Department of Social Welfare and Development Region VI.
Subong nga adlaw, Septyembre 9, sang nag-take oath si Nochete sa pagpanguna ni Social Welfare Secretary Erwin Tulfo.
Sa interview sang Bombo Radyo kay Nochete, iya ginpahayag nga magapasa siya sang iya nga resignation sa pagka-board member.
Antes na-appoint bilang direktor sang Department of Social Welfare and Development Region VI, nagpungko si Atty. Nochete bilang Sangguniang Bayan Member kag bise-alkalde sa Miagao.
Ginakabig sini nga daku nga pagpanghangkat ang bag-o ang katungdanan ilabi na sa tunga sang krisis sa pungsod, apang nagpasalig man nga maga-serbisyo gid sa mga pumuluyo sang Western Visayas sa bulig man sang iban nga mga empleyado sang ahensya.
Samtang, ginpanginbulahan naman sang Iloilo Provincial Government si Nochete sa bag-o sini nga posisyon.
Sa interview sang Bombo Radyo kay Vice Governor Christine Garin, iya ginpahayag nga pat-od nga daku nga bulig ini para sa probinsya sang Iloilo bangud diri naghalin ang bag-o nga direktor.
Ginpaathag man sini kun ano ang matabo sa posisyon ni Nochete bilang board member.
Miyembro si Nochete sang Lakas–Christian Muslim Democrats, gani nagakadapat suno kay Garin nga diri man nga partido magahalin ang indibidwal nga i-appoint nga magabulos sa pagka-board member, sandig man sa kun ano ang nakasaad sa local government code.
Ipasa ang nomination kag endorsment kay Executive Secretary Atty. Vic Rodriguez agud maaprubahan mismo ni President Bongbong Marcos.
Suno kay Garin, posible nga maglawig pa sang isa ka semana antes mahibaluan kun sin-o ang i-fill in sa vacant position. ##
