Sa pihak sang hingyo sang publiko nga ipaguwa na ang listahan sang water refilling stations sa Iloilo City nga nagpositibo sa E-coli kag coliform bacteria, nagapamalibad sa gihapon ang Iloilo City Health Office.
Paathag sang opisina, ang ila lamang nga ipaguwa amo ang lista sang mga water refilling station nga nakapasar sa water potability test.
Sa interview sang Bombo Radyo kay City Health Office Medical Officer IV Dr. Roland Jay Fortuna, iya ginpahayag nga sandig ini sa rekomendasyon sang Iloilo City Legal Office.
Panugyan sang City Health Office, pananglitan duda ang kustomer sa water refilling station nga iya ginabaklan sang tubig, mas maayo nga lantawon ang water potability test result.
May tatak ini suno kay Fortuna nga PASSED.
Magluwas diri, dapat man siguraduhon nga subong nga bulan gin-conduct ang test.
As of September 8, may yara na sang 482 ka kaso sang acute gastroenteritis sa syudad sang Iloilo.
28 diri ang bag-o nga mga kaso.
Sa kabug-usan nga mga kaso, 375 na ang nakarecover, 40 ang admitted sa mga ospital, kag 57 ang ara sa ila puluy-an.
Nagapabilin nga 10 ang patay bangud sa amo nga balatian samtang 12 naman ang nagpositibo sa Cholera. ##
