Nagdangat na sa pito ang nagkalamatay sa syudad sang Iloilo bangud sa Acute GastroEnteritis (AGE).
Sa latest report sang Iloilo City Health Office, tatlo ang nagdugang sa casualties as of August 31.
Yari ang death cases sa Iloilo City:
- duha ka tuig nga bata nga lalaki sa Rizal Pala-pala 1, Iloilo City Proper
- walo ka tuig nga bata nga babayi nga taga-Zone 6, Calumpang, Molo, Iloilo City
- apat ka bulan nga bata nga babayi nga taga-Timawa Tanza II, Iloilo City Proper
- 31 anyos nga lalaki nga taga Zone 3 Sagasa, Hibao-an Norte, Mandurriao
- lima ka tuig nga bata nga taga-Zone 6B, Molo Boulevard, Molo
- 11 ka bulan nga bata nga babayi nga taga-Zone 7, Santo Rosario-Duran, Iloilo City Proper
- 63 anyos nga babayi nga taga-Iznart St., Maria Clara, Iloilo City Proper
Nagdangat naman sa 228 ang total cases sa syudad as of August 31.
Sa 228 cases, 53 ang naka-admit pa subong sa mga ospital ukon 23% sang total cases. 115 naman ang naka-recover; kag 52 ang active cases nga nagapabilin lang sa ila nga mga puluy-an.
Magluwas sa AGE, may walo man ka kumpirmado nga kaso sang cholera sa syudad sang Iloilo.
Agosto 30 sang gindeklarar ang outbreak sini nga food and waterborne diseases sa syudad sang Iloilo.
Buwas, Septyembre 2, ang special session sang Iloilo City Council kaangot sa rekomendasyon sang Iloilo City Disaster Risk Reduction and Management Council nga ideklarar ang state of calamity sa syudad bangud sa amo nga outbreak. ##
