ILOILO CITY— Gin-ako ni Iloilo City Mayor Jerry Treñas nga may kalain ini sang buot kay Iloilo City Lone District Representative Julienne “JamJam” Baronda.
Sa interview sang Bombo Radyo kay Mayor Treñas, iya ginpahayag nga ini ang rason kun ngaa ginkakas sini si Baronda sa ila line-up sa palaabuton nga eleksyon kag ginpahalin man bilang Executive Assistant si former Councilor Love Baronda nga utod sang kongresista.
Suno kay Treñas, may mga kandidato si Cong. Jam Baronda nga kontra sa mga kandidato sang alkalde sang nagligad nga barangay elections kag didto nagsugod ang paglain sang iya buot kay Baronda.
Dugang sang alkalde, sa pagkamatuod, madamo naman ini sang naeksperyensyahan nga kalain sang buot sa politika apang ginadala-dala na lamang niya ini.
Iloilo City Ginakabig ni Iloilo City Mayor Jerry Treñas nga isa man ka mapag-on nga kasumpong kun madayon ang pagtukod sang grupo sang mga kilala man nga mga pulitiko sa syudad.
Ini apisar nga bag-o pa lang naglab-ot sa iya ang amo nga impormasyon paagi sa Bombo Radyo.
Base sa impormasyon nga nakuha sang Bombo Radyo, ang ginabati- bati nga mahimo magpadalagan sa pagka- kongresista agud magbunggo kay Raisa Treñas amo si former Mayor Joe III Espinosa, incumbent Lone District Representative Julienne Baronda sa pagka-alkalde, kag former Councilor Lex Tupas ukon asawa nga si incumbent Councilor Candice Tupas sa pagka-bise alkalde.
Sa interview sang Bombo Radyo kay Mayor Treñas, iya ginpahayag nga kun may kamatuoran man ang amo nga impormasyon,ini bangud nga sa patag sang politika, madamo ang posible matabo.
Suno sa alkalde, ang iya tikang subong sa ila kampo aang isa lamang ka preparasyon para sa ano man nga posible matabo sa palaabuton may kaangtanan sa eleksyon sa 2025.
Wala naman ginadula sang alkalde ang posibilidad nga may national political figure nga yara sa likod sang plano nga pagtukod sang grupo nga magakontra sa grupo ni Treñas apang indi pa niya mapat-ud kon sin-o ini.
