ILOILO CITY — Nagpang-apat ang Iloilo City sa pulo ka mga probinsya kag highly urbanized cities sagwa sang National Capital Region (NCR) sa patag sang Gross Domestic Product (GDP) per capita sa pungsod Pilipinas.
Sa interview sang Bombo Radyo kay Iloilo City Mayor Jerry Treñas, iya ginpahayag nga liwat ginpamatud-an sang syudad nga isa ini ka “beacon of competitiveness and urbanization” sa bug-os nga Pilipinas.
Suno kay Treñas, ginpangabudlayan sang syudad ang nabaton nga kadungganan sa diin nagalaum ini nga mas mangin masangkad pa ang syudad sa masunod nga mga tinuig bangud sa mga plano sini para sa Iloilo City.
Ginapahayag nga ang nagpanguna sa may pinakamataas nga GDP nga nabalhag sang Provincial Product Accounts (PPA) amo ang Baguio City, Cagayan de Oro City, Lapu-lapu City, Cebu, kag Iloilo City.
Tuman naman ang kalipay nga nabatyagan sang alkalde sa bag-o nga accomplishment sang Iloilo City Government.
Nahibaluan nga santo sa data sang Philippine Statistics Authority (PSA), ang Iloilo City ang nagpagguwa sang P306,444 GDP per capita sang 2022 nga ginlakipan sang 16 ka mga pilot regions sagwa sang NCR halin November tubtob December 2023.
