Nagapanawagan si Iloilo 2nd District Board Member Rolito Cajilig nga ipatuman ang temporaryo nga duha ka bulan nga ban sa pagsulod sang buhi nga baboy kag karne sang baboy halin sa guwa sang probinsya sang Iloilo.
Ini agud mabuligan ang lokal nga mga hog raiser kag mapabakod ang ila palangabuhian.
Sa iya mensahe sa session sang Sangguniang Panlalawigan sang Iloilo, ginapanugyan ni Cajilig ang pagpatuman sang ban halin Nobyembre 1 tubtob Disyembre 31, 2026.
Sandig sa data sang Office of the Provincial Veterinarian subong nga Oktubre 2026, may masobra 136,000 ka baboy sa probinsya sang Iloilo.
Sa amo nga numero, masobra 111,000 ang halin sa backyard hog raisers, samtang masobra 24,000 ang halin sa commercial hog farms.
Pinaagi sa proposal, ginapanugyan nga usisaon kun paano nakaapekto ang pagpasulod sang mga baboy halin sa guwa sang probinsya sa lokal nga supply, demand sa merkado kag presyo sang mga baboy.
Base sa live hog price monitoring report sang Office of the Provincial Veterinarian, ang presyo sang buhi nga baboy sa nagkalain-lain nga bahin sang Iloilo yara sa P130 tubtob P170 kada kilo, nga may average nga P150 kada kilo.
Sa pihak nga bahin, ang presyo sang karne sang baboy sa merkado kag sa mga roadside seller yara sa P220 tubtob P340 kada kilo, nga may average nga P280 kada kilo.
Ginapanugyan sa resolution nga usisaon ang dako nga deperensya sang presyo nga nabaton sang mga hog raiser kag sang presyo sang karne nga ginabaligya sa merkado.
Nahaibaluan nga ang mga backyard hog raiser amo ang nagasalo sang nagkalain-lain nga galastuhan sa pagpadaku sang baboy, lakip ang feeds, veterinary medicines, labor, utilities kag iban pa nga kinahanglanon sa ila operasyon.
Sandig sa proposed resolution, importante ang pagpadayon sang lokal nga industriya sang baboy para sa palangabuhian sang mga pamilya kag sa suplay sang pagkaon sa Iloilo.
Ginapanugyan man ang temporaryo nga ban bangud nagahilapit na ang Christmas kag year-end season, nga mahimo magpataas sang demand sa karne sang baboy.
Pinaagi sa proposed measure, ginalauman nga makabaton sang mas dako nga oportunidad ang lokal nga mga hog raiser nga mabaligya ang ila mga baboy sa sini nga tinion.
