Madinalag-un nga nabaton sa prestihiyoso nga The Hague Academy of International Law sa The Netherlands ang isa ka Ilonggo nga abogado nga si Atty. Kaiser Cordero sang Dueñas, Iloilo.
Sa interview sang Bombo Radyo, ginpahayag ni Atty. Cordero nga sang nagpadala siya sang iya aplikasyon sa amo nga programa, wala gid siya nag-ekspektar nga mangin isa sa mga mapili bangud sa kabudlay kag kabug-aton sang proseso.
Ginpakigbahin man sini nga tatlo lamang ka Pilipino sa bilog nga pungsod ang nabaton sa amo nga programa, kag siya lamang ang naghalin sa Iloilo, isa ka butang nga naghatag sang daku nga dungog indi lamang sa iya, kundi amo man sa Ilonggo community.
Ang iya special course sa karun ang magalawig asta sa bulan sang Hulyo sang sini nga tuig, kun sa diin ginapaabot nga matun-an niya ang mga mabug-at nga isyu kaangay sang international crimes, crimes against humanity, kag iban pa nga may kaangtanan sa international justice system.
Suno pa kay Atty. Cordero nga kun ma-grant sa iya ang diploma nga may equivalent sa isa ka doctorate, mangin bukas ini nga dalan agud sarang siya maka-representar sang isa ka Estado, pungsod, ukon indibidwal nga nagapangatubang sang kaso sa international courts. Ini nga mga kaso may kaangtanan sa mga kilala nga personalidad kag isyu nga ginatan-aw sang bilog nga kalibutan.
Para kay Cordero, ini nga oportunidad indi lamang para sa personal nga handum, kundi isa ka misyon nga magahatag boses kag representasyon sa mga Pilipino sa international arena sang hustisya.
