ILOILO CITY – Madamo sang plano ang isa ka Ilonggo nga fiscal matapos nagsumpa bilang Prosecutor General sang National Prosecution Service (NPS).
Ini amo si Atty. Benedicto Malcontento nga tumandok sang Jelicuon Montinola Cabatuan, Iloilo.
Mismo si Department of Justice (DOJ) Menardo Guevarra ang nagpasumpa kay Malcontento.
Si Malcontento ang nagtal-os kay retired NPS prosecutor general Victor Sepulve.
Nagtapos ini sa iya pre-law sa University of San Agustin sa diin nagkuha ini sang kurso nga Bachelor of Arts Major in Political Science kag nagkuha sang iya pagka abogasya sa San Beda College of Law.
26 ka tuig nga nangin abogado si Malcontento sa private sector.
Sa interview sang Bombo Radyo kay Malcontento iya ginpahayag nga siya ang magapamuno sa 2,500 ka mga prosecutors sa bug-os nga Pilipinas.
Lakip sa mga tutukan ni Malcontento amo nga pagpadasig sa pagsolbar kag pagtutok mga kaso nga naga apekto sa ekonomiya kag sa kalinong kag katawhay.
Sa subong suno kay Malcontento, kulang pa sila sang 500 ka mga prosecutor agud makumpleto ang Judicial system.
Nagpanawagan man ang natungdan sa mga abogado nga magsulod sa gobyerno kag mangin prosecutor.
Ginpasalig man sang bag-o nga NPS prosecutor general nga mangin patas sa pag prosecute sa mga kaso ka indi magbase sa political color, religious belief, kag socioeconomic standing.
