Liwat nga magapakigbahin ang Iloilo Police Provincial Office ukon IPPO sa pagahiwaton nga Dugong Bombo 2026 sa Nobyembre 14.
Sa interview sang Bombo Radyo kay Police Colonel Bayani Razalan, direktor sang IPPO, iya ginpahayag nga sa sulod sang madamo na ka tuig, wala gid ginakalipatan sang mga Ilonggo nga pulis ang pagpakigbahin sa amo nga blood donation drive.
Suno kay Razalan, daku nga dungog para sa mga pulis nga mangin instrumento sa pagluwas sang kabuhi sang madamo nga Pilipino paagi sa pagdonar sang dugo.
Dugang pa niya, luwas sa paghatag sang proteksyon sa mga pumuluyo, mas nagahatag ini sang mas madalom nga kahulugan sa ila pagserbisyo ang boluntaryo nga pagdonar sang dugo.
Ang Dugong Bombo isa ka makahulugan nga programa sang Bombo Radyo Philippines, in partnership sa Bombo Radyo Philippines Foundation, Inc. kag Philippine Red Cross.
Dungan nga pagahiwaton ang blood donation drive sa bug-os nga pungsod sa mga lugar nga may Bombo Radyo kag Star FM stations.
Diri sa Iloilo, patigayunon ang aktibidad sa Iloilo Science and Technology University sa La Paz, Iloilo City.
Ang mga donor nga makapasar sa screening kag madayon nga makadonar sang dugo makabaton sang limited-edition Dugong Bombo T-shirt, vitamins, kag hot meals.
Gin-agda ang publiko nga magpakigbahin sa sini nga programa agud makabulig sa pagluwas sang kabuhi paagi sa safe kag boluntaryo nga pagdonar sang dugo.
Dugong Bombo: A Little Pain, A Life to Gain.
