ILOILO CITY – Handum sang isa ka Ilonggo Martial Artist nga makuha ang bulawan nga medalya sa Tunggal sa Sea Games 2019.
Sa interview sang Bombo Radyo kay Edmar Tacuel sang Brgy. Nagban, Tubungan, Iloilo, iya ginpahayag nga tuman ang iya paghanda agud nga makahatag sang dungog para sa Pilipinas.
Suno kay Tacuel, opisyal siya nga miyembro sang Philippine Pencak Silat Team nga ginabug-usan sang 15 ka player apang siya ang isahanon nga magahampang sa Tunggal.
Ginpahayag ni Tacuel nga ang Tunggal ang isa ka performance nga may yara partikular nga dance movement kag ginagamitan sang malaba nga stick kag binangon.
Una niya nga natun-an ang amo nga hampang sa ila banwa kag nagpaidalom sa training sa Iloilo Science and Technology University kun sa diin siya nagtapos sang pagtuon.
Madamo naman siya sang ginpasakupan nga mga kompetisyon, ilabi na ang Batang Pinoy sang 2013 sa Maasin City, Southern Leyte sa diin nakakuha siya sang tatlo ka silver medal.
Nagpakigbahin man si Tacuel sa mga international event sa Singapore kag sa 1st World Beach Pencak Silat Championship sa Patong Beach Phuket, Thailand sang Oktubre 1 kun sa diin, nakuha niya ang silver medal.
