Isa ka babayi nga katapo sang LGBTQIA+ community ang nag-ako nga siya ang iloy sang lapsag nga lalaki nga ginbilin sa kilid sang bodega sa Barangay Concepcion, City Proper sang aga sang Hulyo 30.
Sa interview sang Bombo Radyo kay Police Captain Melchor Tolentino, officer-in-charge sang Iloilo City Police Station 1, iya ginpahayag nga ila narekober ang CCTV footage halin mismo sa mga barangay officials kag didto nakita nga may isa ka babayi nga nagaagi sa lugar samtang may ginakungkung nga nakaputos sa jacket mga pasado alas-12:40 sang kaagahon sang Hulyo 30.
Sang mga ala-7:00 sang aga, nasawpan sang isa ka security guard ang lapsag nga lalaki sa nasambit nga lugar nga buhi kag naka-angut pa ang pusod sini.
Ginpangusisa sang mga kapulisan ang mga residente sa palibot kag ginpakita ang CCTV footage.
Paagi sini, nakilala ang babayi nga si alyas Inday, 25-anyos kag indi ini residente sang Barangay Concepcion kundi naga-renta sa Barangay Boulevard, Molo, Iloilo City.
Nahibaluan nga nagabiyahe ini siya sang e-bike sa City Proper.
Narekober sang kapulisan ang iloy sang lapsag sa Boulevard, Molo kag iya gintuad nga siya ang babayi nga ara sa CCTV footage.
Suno kay PCapt. Tolentino, una nga ginpanginwala ni Inday ang akusasyon, pero sa ulihi gin-ako man niya nga siya ang iloy sang bata.
Ginpa-idalum sa medical examination si Inday kag sa bulig nga assessment sang CSWDO, nahibaluan nga nagasuprer sang psychological disorder ukon deperensya sa paminsaron ang Iloy sang bata.
Nag-ako siya nga siya mismo ang nagpabata sa iya kaugalingon sa ila puluy-an sa Boulevard, Molo kag iya ginhaboy ang placenta sa baybay.
Sang ulihi, ginpangitaan niya sang lugar nga mabilinan ang bata kag didto niya ginbilin sa Brgy. Concepcion.
Ginkumpirmar ni PCapt. Tolentino nga si Inday isa ka lesbian kag katapo sang LGBTQIA+ community.
Indi niya mahatag ang detayle kon sin-o ang amay sang iya bata bangud sang iya kahimtangan sa paminsaron.
Sa subong, ang lapsag nga lalaki padayon nga naka-confine sa Western Visayas Medical Center kag yara pa sa under observation tungod nagkaimpeksyon ini bangud sang sitwasyon sang pagkabun-ag sa iya.
Dugang pa ni PCapt. Tolentino nga bangud wala si Inday sa insakto nga paminsaron, indi siya mapasakaan sang kaso kriminal.
Gina-assess sa subong sang CSWDO kon may kapasidad si Inday nga mag-atipan sa iya bata apang kon makita nga indi niya ini kaya posible nga ipa-adopt na lang ang lapsag para masiguro nga matipigan kag mahatagan sang insakto nga pag-atipan.
By: 𝑩𝒐𝒎𝒃𝒐 𝑲𝒓𝒚𝒍𝒍𝒆 𝑴𝒆𝒍𝒍𝒊𝒛𝒂
