Gin-aprubahan na sang Sangguniang Bayan sang Pavia ang pagbakal sang bag-o nga fire truck nga may P10 million nga budget.
Ini nga development ang kasunod sang rekomendasyon ni SB Member JP Peñol para mahatagan sang gilayon nga atensyon ang paglikaw sa sunog kag madasig nga pagresponde kun magluntad gid man ini.
May kaangtanan ini sa natabo nga sunog sang nagligad nga Abril 19 sang aga kun sa diin ginlamon sang kalayo ang isa ka two-storey residential structure kag repair shop sa corner Leocadio kag Evangelista Streets sa amo nga banwa.
Sa iya nga privilege speech sa atubang sang iya kaupdanan sa municipal council, ginsiling ni Peñol nga indi dapat magsalig ang Pavia sang pag-abot sang fire trucks halin sa iban nga banwa agud magbulig sa ila.
Sa interview naman sang Bombo Radyo kay Peñol, iya ginpahayag nga pila sa importante nga rekomendasyon nga iya ginpresentar amo ang pag-procure sang bag-o nga equipment.
Suno sa iya, gin-recommend niya sa Municipal Development Council (MDC) ang pagbakal sang bag-o nga fire truck.
Pahayag niya, ini nga life-saving equipment ang maga-boost sang kapasidad sang Bureau of Fire Protection sa pagresponde sa sunog ilabi na sa malayo nga mga barangay sang banwa.
