Ginapaabot sang Bangko Sentral ng Pilipinas (BSP) nga magapadayon ang pagnubo sang inflation sa bulan sang Hulyo, base sa ila prediksyon nga maga-range lang ini sa 0.5% tubtob 1.3%. Ini nga numero mas manubo kumparar sa 1.4% nga narekord sang Hunyo kag layo sa 2% tubtob 4% nga target range sang mga economic managers.
Suno sa BSP, posible ang pagtaas sang presyo sang karne kag mga utan tungod sa indi maayo nga panahon, kasubong man sang pagsaka sang kuryente, mahal nga presyo sang lana sa lokal nga merkado, kag ang pag-depresyar sang piso ang magadul-ong sang pressure sa presyo. Apang ginpahayag man nga ini nga pressure mahimo mabalanse sang padayon nga pagnubo sang presyo sang bugas.
Ginpamatuod sang Philippine Statistics Authority (PSA) nga nagapadayon ang pagnubo sang presyo sang bugas sa mga nagligad nga bulan, dala sang pagpanubo sang taripa sa importasyon sini.
Sa pihak nga bahin, ang piso nag-depresyar halin sa ₱55.70 kontra dolyar sang umpisa sang Hunyo, pakadto sa ₱58.32 sa katapusan nga adlaw sang trading sa Hulyo.
Ginapaabot nga ipagwa sang PSA ang opisyal nga inflation rate sa Martes, Agosto 5.
Tungod sa manubo nga inflation, nakahimo ang BSP sang duha ka beses nga pagpanubo sang interest rate subong nga tuig, nga nagresulta sa total nga 50 basis points nga reduction. Ang benchmark interest rate sang BSP yara na subong sa 5.25%, kag may posibilidad nga magapadayon pa ini nga panubo sa masunod nga policy-setting meeting sa Agosto, suno sa mga economic analysts.
