Nagdepensa si Senate President Francis “Chiz” Escudero nga ang intensyon sang Senado nga iduso ang temporaryo nga suspensyon sa Public Utility Vehicle Modernization Program (PUVMP) amo nga hatagan kuntani ang gobyerno sang tion nga mabinag-binag ang problema kag makaayo ang pagpatuman sang kontrobersyal nga programa.
Ginplastar ini liwat ni Escudero matapos nga ginbasura ni President Ferdinand “Bongbong” Marcos Jr. ang resolution sang mga senador nga nagapanawagan sang suspension sa modernization program sa transportasyon.
Suno sa senate president, anum ka tuig na halin sang gin-roll out ang amo nga programa apang minority pa lamang ang local manufacturers sa mga jeep kag mas madamo gihapon ang foreign manufacturers.
Ginklaro sini nga indi nila intensyon nga untaton ang programa, kundi ma-preno lang sang gamay kag magbalik kun ano ang kakulangan antes dalayon nga mag-arangka liwat sa implementasyon.
“Walang masama pag preno ng konti. Mag-menor ng konti at balik-tanawan ang mga kakulangan na pwedeng punuan bago tuluyang umarangkada ika nga,” pahayag sang Senate leader.
Paathag pa sini, ang Senate Resolution No. 1096 nga pirmado sang 22 ka mga senador ang mag-apply lamang kuntani sa mga wala pa naka-comply sa mandu sang gobyerno kag indi para sa nakatuman na sa consolidation.
Ginpahayag pa sini nga ang ginahingyo lamang kuntani sang mga senador sa Department of Transportation (DOTr) amo nga maghatag sa Congress sang detalyado nga impormasyon kaangot sa programa kag ano ang ila pagpanghanda para sa implementasyon.
“Ang hinihiling ng Senado ay simple, ayusin niyo na muna bago niyo lubusan at tuluyang ipagbawal lahat.Ngayon, iyong mga nag-comply at sumunod na, hindi naman namin sinasabing bawiin at itigil. Nandun na iyon, alangan naman babawiin mo pa,” dugang sini.#
