Nakaabot na sa Estados Unidos sang Amerika si President Ferdinand Marcos Jr. para sa duha ka adlaw nga working visit.
Nag-abot ang punong ehekutibo sa New York Domingo sang hapon (New York time) paagi sa chartered flight. Domingo sang aga (oras diri sa Pilipinas) ang naghalin si Marcos diri sa pungsod.
Kaupod niya sa byahe sanday First Lady Liza Marcos, Foreign Affairs Secretary Maria Theresa Lazaro, Migrant Workers Secretary Hans Leo Cacdac, Presidential Peace Adviser Carlito Galvez Jr., kag Presidential Communications Secretary Dave Gomez.
Lakip sa iya nga schedule samtang yara sa New York amo ang high-level engagements sa United Nations.
Ginalauman nga ipanawagan sini sa mga lideres sa Middle East kag sa tanan nga involved sa gyera nga tahuron ang international law kag ang UN Charter.
Ginalantaw sang Department of Foreign Affairs (DFA) nga ang UN ang husto nga lugar kun sa diin makapanawagan sang kalinong ilabi na bangud masobra duha ka milyon ka mga Pilipino ang yara sa rehiyon.
Magapakigkita man mismo si Marcos kay UN Secretary-General António Guterres agud madiskusyunan ang mga development sa Middle East.
Suno naman kay Enrique Manalo, ang Permanent Representative sang Pilipinas sa United Nations sa New York, iplastar man sang presidente ang commitment sang Pilipinas sa pagtuman sa international law bilang paagi agud nga ma-promote ang kalinong sa kalibutan.
Gin-anunsyo naman sang Malacañang nga gin-assign sanday Executive Secretary Ralph Recto, Education Secretary Sonny Angara, kag si Agrarian Reform Secretary Conrado Estrella III bilang caretakers sang gobyerno sa Pilipinas samtang yara pa sa luwas sang pungsod ang presidente.#
