Nagapang-pito ang isa ka Ilonggo sa 278 ka mga kadete nga kabahin sang graduating class sang Philippine Military Academy (PMA).
Ini amo si Cadet First Class Floyd Niño Arthur Roxas, 23, residente sang Barangay Cagamutan Norte, Leganes, Iloilo.
Antes ini nakapasar sa entrance exam sang PMA, nag-eskwela ini anay sa Philippine Science High School Western Visayas Campus kag nag-gradwar nga With Honors.
Sa iya pagtapos sa akademya, batunon sini ang Information Technology Plaque, Department of Leadership Plaque, kag ang Association of Generals and Flag Officers (AGFO) Award. Natalana man ini nga magsulod sa Philippine Navy.
Ang lista sang topnotchers ang gin-anunsyo sa Longayban Hall, Fort General Gregorio H. Del Pilar sa Baguio City, Mayo 10, samtang ang graduation naman ang patigayunon sa Borromeo Field sa PMA sa Mayo 18.
Nagapanguna diri si Cadet First Class Jeneth Elumba, 24, residente sang Surigao del Norte, kag anak sang isa ka mangunguma.
Ang 2024 Bagong Sinag Class ang ginabug-usan ang 224 ka mga lalaki nga kadete samtang 54 naman ang mga babaye. Sa kabug-usan, 144 ka mga kadete ang magasulod sa Philippine Army, 72 sa Philippine Navy, kag 62 sa Philippine Air Force.
Photo: PIA Cordillera Administrative Region
