Nagapati ang isa ka propesor nga dako sa gihapon ang papel sang radyo sa publiko sa idalom sang digital era.
Sa interview sang Bombo Radyo kay Dr. Shiela Mae Quero, Broadcasting Division Chair sang College of Communication sa West Visayas State University, iya ginpahayag nga importante ang radyo ilabi na sa mga lokal nga komunidad bangud ini amo ang numero uno nga ginahalinan kag nagapalab-ot sa ila sang balita.
Suno kay Quero, isa sa mga ginapangatubang nga threat sang radyo amo ang makabag-o nga teknolohiya, apang nagapati man ini nga dako man ang mabulig sini ilabi na sa pag-adoptar sang radyo sa social media platforms nga makabulig gid sa pagpalapnag sang insakto nga mga impormasyon.
Ginpakigbahin man niya nga isa man sa ila nga problema sa institusyon nga nagahatag sang media related course nga magamay nalang ang nagasulod nga mga studyante sa kurso nga Broadcasting.
Nagapati man si Quero nga indi madula ang radyo ilabi na kun padayun ang inobasyon kag mangin bukas ang industriya sa panibag-o nga mga teknolohiya.
Dugang pa sang propesor nga kinahanglan gid nga padayunon sang mga estasyon ang insakto nga pagbalita agud nga padayun man ini nga pamatian sang publiko.
