Nangin labing-una nga Registered Fisheries Professional sa iya pamilya si Brent Terucha Samontanes nga Rank 9 sa ginpatigayon nga October 2026 Fisheries Professional Licensure Examination.
Tumandok siya sang Cabatuan, Iloilo apang nag-eskwela sa Iloilo State University of Fisheries Science and Technology (ISUFST) sa Tiwi, Barotac Nuevo kun sa diin nag-gradwar siya bilang Magna Cum Laude.
Sa Good Morning Philippines program sang Bombo Radyo Iloilo, ginpakigbahin sini nga graduate sang Marine Biology ang iya magulang sa amo man nga buluthuan.
Sa iya bahin, ginpili sini nga mag-enroll sa Fisheries Program bangud sa scholarship program sang Department of Agriculture–Bureau of Fisheries and Aquatic Resources (DA-BFAR) 6.
Apisar nga ini ang iya una nga rason, natun-an sini nga apresyaron ang iya degree program samtang nagadugay ang iya pag-eskwela.
“Para lang ini tani sa scholarship. Sang nag-umpisa na kami tuon sang isda, na-amaze ko nga sang una nagakaon lang ako sang isda, tapos nabal-an ko nga ang isda gali lain-lain iya nga himbis, ang types of mouth, kag ang mechanisms kung paano sila mag-survive,” suno kay Samontanes.
Subong nga pasado na ini sa pasinawan, ang luyag gid ni Samontanes amo nga makabulig sa pag-address sa food security amo man sa mga kahangawa sa ruling sang Supreme Court nga nagapahanugot sa commercial fishing sa sulod sang municipal waters.
“For me, indi gid siya dapat, knowing nga ang municipal waters considered sila nga critical habitat, kag daku gid ang ila role para ma-secure ang future naton nga nagasalig sa aton nga kadagatan,” dugang sini.
Ginpasalamatan man ni Samontanes ang iya pamilya, manunudlo halin sa elementarya tubtub sa kolehiyo, kag tanan nga nagbulig sa ila lakip na ang BFAR agud nga maka-graduate kag makapangibabaw sa pasinawan.
Ang iban pa nga BFAR scholars sa Western Visayas nga nangin topnotchers sa exam amo sanday Gerson Berano (Rank 1), Regie Pancho (Rank 7), kag Aleanna Marie Pancho (Rank 9) sang Northern Iloilo State University (NISU); kag Josh Daniel Nombre (Rank 10) sang Carlos Hilado Memorial State University sa Negros Occidental.#
