Pigado man ang pangabuhi halin sa lamharon nga edad apang wala ini nakapugong sa estudyante sang Northern Iloilo State University (NISU) Main Campus sa Estancia, Iloilo nga mangin Rank 1 sa October 2026 Fisheries Professional Licensure Examination.
Ini amo si Gerson Celeste Berano, tumandok sang Barangay Tinigban, Carles nga nakaangkon sang rating nga 90.25% sa pasinawan.
Ika-anum sa walo ka mag-utod si Berano.
Pahayag sini, wala pa siya naka-graduate sa elementarya, nagtaliwan na ang iya nga amay, gani nga nagtinguha ang iya iloy sa pagbaligya sang utan, prutas, kag iban pa sa ila nga palibot.
Ginpakigbahin man sini nga ang mayor nga rason nga nagkuha ini sang nasambit nga degree program sa NISU amo ang Fisheries Scholarship Program sang Department of Agriculture–Bureau of Fisheries and Aquatic Resources (DA-BFAR) 6.
“Looking back to my high school days, I did not even know that the Fisheries program existed. Everything changed when my high school teacher, Ma’am MJ, introduced the BFAR scholarship program. Without hesitation, I applied,” kabahin sang iya Facebook post matapos nagpangibabaw sa examination.
Magluwas diri, nagapuyo man sanday Berano sa isa ka coastal barangay kag nagatrabaho man bilang manugpangisda ang iya mga magulang gani nga naghatag ini sang inspirasyon sa iya nga tun-an ang siyensya sa likod sang fishing sector.
Nagpasalamat si Berano sa iya mga manunudlo kag magulang nga nagbulig man sa iya sa pagpadayon sa pag-eskwela agud malab-ot ang iya mga handum.
“Kada Domingo, gapamati gid ako sa Good Morning Philippines sang Bombo Radyo Iloilo. Kis-a may mga segment nga naga-interview sila sang mga topnotchers. Hambal ko sadto, ‘tani maabot man ang time nga ma-interview ako diri.’ So, nag-abot gid,” suno kay Berano sa interview sa iya sa Good Morning Philippines, Oktubre 11.
Ginakabig sini ang iya kaugalingon nga buhi nga pamatuod nga ‘wala sang imposible’ kun nagahimakas.
“Sa mga estudyante dira nga may struggles [kag] pigado gid sa pangabuhi, padayon lang sa pag-eskwela. Indi lang madulaan sang pag-asa. Ako gid ang living proof nga wala sang imposible kun naga-pursige ka sa handum mo sa kabuhi,” dugang niya.
Gin-engganyo sini ang iban nga kuhaon ang oportunidad nga mag-apply sa scholarships kaangay sang ginatanyag sang BFAR agud nga makabulig sa pagtapos sa kolehiyo.#
