Ginapatuman na sang Iloilo State University of Fisheries Science and Technology umpisa sang Pebrero 2, 2026 ang 4 day compressed workweek para sa bilog nga 2nd semester sang academic year.
Ini amo ang nangin resulta matapos ang ginpatigayon nga survey sa mga staff kag studyante sang ISUFST nga naga-ugyon sa pagpatuman sang 40-hour workweek kun sa diin ginre-organize ang schedule sang mga klase.
Sa interview sang Bombo Radyo kay Dr. Herman Lagon, Director of the Public Affairs, Marketing, and Media Communications Office (PAMMCO), ISUFST, iya ginpahayag nga sa baylo sang nakaandan nga pagbalik-balik sa eskwelahan humalin lunes tubtob byernes, mangin lunes tubtob huwebes na lang ang klase kag opisina.
Matapos ang isa ka bulan nga implementasyon, nakabatun ini sang positibo nga feedback halin sa mga studyante kag sa mismo nga mga personnel sang unibersidad.
Suno pa kay Lagon, isa ka work efficient, cost-efficient kag may maayo nga resulta sa ikaayong lawas sa ila nga mga staff kag studyante ang nasambit nga 4 day compressed workweek.
Sa interview naman sang Bombo Radyo kay Dr. Jescel Bito-onon, Vice President for Administration and Finance sang ISUFST, iya gin-athag nga may ara sang nagasunod sa gihapon sa daan nga schedule nga mga staff sang farm, fishponds kag agricultural stations sang unibersidad bangud man sa ila ginabantayan nga mga livestocks.
Dugang pa niya nga madamo sila sang ginapang-ubra nga mga tikang antes nga maaprubahan sang board of regents ang nasambit nga 4 day compressed workweek
