Nagdugang pa ang nagpahayag sang interes nga ipasaka sa Korte Suprema ang isyu sang paghatag sang zero subsidy sa Philippine Health Insurance Corp. (PhilHealth).
Suno kay Sen. Pia Cayetano, ang tikang sang bicameral conference committee nga kakason ang subsidiya sa state insurer ang nagalapas sa Sin Tax Law nga amo ang nagasiling nga ang portion sang nakolekta nga buwis ang dapat nga ihatag para sa universal health care.
Suno kay Cayetano, 80% sang revenues halin sa tobacco products kag sugar-sweetened beverage ang dapat nga ipain para sa PhilHealth santo sa nakasaad sa layi.
Sa 2025, ang amount sang sin tax collection ang nagadangat sa P69 billion apang dapat kwestyunon suno sa iya kun ngaa zero ang ihatag sa PhilHealth.
Ginplastar ni Cayetano nga nahangpan sini ang posisyon sang Senado nga indi na nagakabagay ang PhilHealth para sa government subsidy bangud sa wala nagamit nga P600 billion sa reserve funds, apang dugang niya, mandato man sang gobyerno nga suportahan ang ahensya sa payments sang premiums para sa indirect contributors.
Antes sini, nagpahayag man si Ex-Finance undersecretary Cielo Magno nga kwestyunon nila sa Supreme Court ang pagkakas sang subsidiya sa PhilHealth bangud makabig ini nga “unconstitutional.”
Ini bangud kun aprubahan na ni President Marcos ang budget bill, buot silingon, dalayon na lang nga isalig sa PhilHealth members kag direct contributors ang pag-cover sang premiums para sa indirect contributors kaangay sang mga pigado, senior citizens, kag mga wala sang trabaho.
Matandaan nga kabahin si Magno sang grupo nga nagpetisyon sa Korte Suprema agud balabagan ang pagsaylo sang P89.9 billion sang PhilHealth funds sa national treasury. Bangud sa amo nga tikang, may yara anay sang gin-isyu ang korte nga temporary restraining order.
Antes gin-aprubahan sang bicameral panel ang zero budget sa PhilHealth subsidies, natalana kuntani nga magbaton ang state insurer sang masobra P74 billion sa government subsidies nga nagalakip sang P50 billion para sa premiums para sa unemployed kag P20 billion para sa additional benefits.
Ginkakas ini sang bicameral body bangud sa ginaalegar history sang PhilHealth sa mahinay kag inefficient budget utilization apisar sang ila nga excess funds.
