Napaslawan ang Philippine Women’s Football Team nga maka-score batok sa powerhouse team nga Japan sa ila nga pag-atubangay sa quarterfinals sang AFC Women’s Asian Cup 2026.
Nagtakop ang hampang sa Stadium Australia sa Sydney, 7-0, rason nga nag-abante na ang Japanese squad sa semifinals sang tournament kun sa diin natalana sini nga atubangon ang South Korea.
Magluwas diri, sigurado na ang pwesto sang Japan sa FIFA Women’s World Cup sa masunod nga tuig sa Brazil.
Ini na ang ika-10 nga tuig nga magahampang ang Japan sa World Cup. Nagdaog sila sa amo nga global sports event sang 2011.
Sa pihak nga bahin, bisan na-blangko sang mga Japanese players, buhi pa ang paglaum sang Philippine team nga makabalik sa World Cup Stage.
Matabo ini kun malutos nila ang Uzbekistan sa play-in match sa Marso 19 sa Gold Coast Stadium sa Queensland, Australia.
Nalutos ang Uzbekistan sa kamot sang South Korea, 6-0, sa quarterfinals sang Sabado.
Isa ka bes lang nga nagdaog ang Pilipinas sa Asian Cup sang ginlutos sini ang Iran, 2-0, sa group stage.
