Halos daw mabugto na ang ugat sang mga drivers sa ugtas sang padayon nga pagsaka sang presyo sang produktong petrolyo.
Sa interview sang Bombo Radyo kay Mr. Raymundo “Boyet” Parcon, ang presidente sang Iloilo City Loop Alliance of Jeepney Owners and Drivers Association (ICLAJODA) kag chairperson sang Western Visayas Transport Cooperative, iya ginpahayag nga madamo na sa mga drivers ang nagareklamo bangud wala na sila sang madala nga kita pauli sa ila pamilya bangud sa tuman kataas nga presyo sang gatong.
Suno kay Parcon, indi man mahimo sang transport groups sa syudad nga gulpyada nga magpasaka sang plete bangud maapektuhan man ang mga commuters.
Nahibaluan nga ginaduso sang ICLAJODA nga pasakaan sang P2.50 ang minimum fare mas manubo sa ila tuyo nga P5.00.
Ginpabilin nga P2.50 ang proposed nga pagsaka sa plete suno sa natungdan bangud ila pa ginahulat ang resolusyon sa ila petisyon nga i-suspende ang excise tax kag VAT sa mga produktong petrolyo.
Sa pihak nga bahin, nagapanawagan naman ang mga drivers nga kuntani ideritsu sa ila ang ila mabaton nga fuel subsidy kag indi na pag-ipaagi sa mga operators.
Gina-ekspektar naman suno kay Parcon nga maga-abot subong nga semana ang fuel subsidy sang mga drivers nga kabahin ang P2.5 billion nga ginpirmahan ni Presidente Rodrigo Duterte.
Mas maayo kuntani suno sa natungdan nga idiretsu sa mga accredited gasoline station ang fuel subsidy agud nga malikawan ini nga ma withdraw in cash.
