Kun naga-apply gani ikaw sa trabaho, masami nga hambalan ka sang imo prospective employer nga “hulat ka lang sa update ha, basi sa masunod semana ah.”
Indi gani silingan ka nga, “Don’t call us, we’ll call you.”
Sa masami, wala na nagaabot ina nga update, kag daw halangpon naman kun ano ang resulta sang imo application kun amo sina ang matabo.
Apang may isa ka babaye nga madugay gid nga naghulat sa sabat sang employer, kag siling gani nila, “better late than never.”
Nag-abot ang reply sa iya, apang lima ka dekada man ang nagligad.
Ang babaye amo si Tizi Hodson, isa ka 70-anyos nga Lola nga naga-istar sa Lincolnshire county sa England.
Sang 1976, nagpadala siya sang sulat sa isa ka kumpaniya agud mag-apply bilang motorcycle stunt rider.
Adlaw-adlaw niya nga ginalantaw kun may sabat na sa iya sulat, apang nalipatan na lang niya ang iya dream job, wala gid nag-abot ang reply.
Tubtub subong nga 2024, amo na lang ang iya kakibot nga ginbalik sa iya ang iya nga application letter nga may yara pa sang isa ka handwritten note.
Sa amo nga note nakasiling nga late delivery ang sulat bangud nakit-an ini nga nakabutang lang sa drawer.
Na-amaze gid si Tizi sa amo nga reply, apang wala siya nakahibalo kun sin-o ang nagbalik sang sulat.
Wala man siya nakahibalo kun paano siya natultulan bangud pahayag sini, halos 50 ka beses na siya nagsaylo sang ilistaran kag apat tubtub lima ka pungsod na ang iya natiniran.
Sang mga tinuig nga wala gid siya nakabaton sang reply sa iya application bilang motorcycle stunt rider, nag-apply siya sa iban nga trabaho kag nakapangabuhi man bilang snake handler, horse whisperer, aerobatic pilot kag nangin flying instructor.
Ginbalikan man sini ang tyempo nga arisgada gid siya nga mangin stunt rider kag wala man sini ginpahibalo sa aplikasyon nga babaye siya, bangud suno sa iya, gusto gid kuntani niya nga ma-interview kag nagpromisa pa siya nga wala siya sang labot bisan pila ka beses pa siya nga mabalian sang tul-an basta mabaton lang siya sa trabaho.
“If I could speak to my younger self, I would tell her to go and do everything I’ve done. I’ve had such a wonderful time in life, even if I have broken a few bones,” pahayag ni Tizi.#
