Nagpromisa si US President Joe Biden nga hatagan ang Ukraine sang lima ka bag-o nga strategic air defence systems agud nga batuan ang wala-untat nga pagpang-atake sang Russia.

Kabahin ini sang speech sang presidente sang iya gin-abi-abi ang mga lider sang North Atlantic Treaty Organization (NATO) sa pagbukas sang tatlo ka adlaw nga summit sa Washington DC.

Sa amo nga speech, ginsiling ni Biden nga mas gamhanan subong ang NATO samtang nga ginaatubang sini ang mga hitabo sa tunga sang gyera sang Russia kag Ukraine.

Suno kay Biden, magapares ang Amerika sa Germany, Italy, the Netherlands kag Romania agud mag-donar sang Patriot missile batteries kag iban pa nga systems sa Ukraine bangud man sa mga sibilyan nga nagkalamatay sa atake sang Russia.

Matandaan nga sang nagligad nga adlaw, ginpulbos sang missiles sang Russia ang children’s hospital sa Kyiv nga isa sa pinakamalala halin sang nagsugod ang Russian invasion sang Pebrero 2022.

43 ka mga tawo halin sa nanuhay-tuhay nga bahin sang Ukraine ang napatay sa amo nga pagpang-atake sang Lunes nga adlaw kag masobra naman sa 100 ang napilasan.#