Napaidalom na sa inquest proceedings sa Sta. Cruz Regional Trial Court ang Philippine Basketball Association (PBA) player nga si John Amores kag ang utod sini nga na-involve sa isa ka shooting incident sa Laguna.
Pananglitan makalusot ang reklamo nga attempted murder, mahimo nga kaso, kag madutlan ang mga ginreklamo, ang mag-utod nga Amores ang maga-atubang sang anum tubtub dose ka tuig nga pagka-preso.
Amo man ini ang makabig nga posible “premature end” sang basketball career ni Amores nga subong 24-anyos pa lamang.
Nag-ugat ang insidente sa isa ka basketball game sa Laguna kun sa diin may baisay nga natabo sa Barangay Maytalang Uno sa Lumban. Pasado alas sais sang gab-i sang Miyerkules sang nagpalupok si Amores sang pusil kag gintuyo nga iguon ang kontra sini nga si Lee Cacalda.
Maswerte nga wala sang samad ang biktima apang nakit-an gid sa CCTV kun ano kadasig ang pagtal-as sini sang nagpalupok na ang suspek.
Alas dos sang kaagahon kahapon sang nagsungka ang mag-utod sa otoridad bangud sa ginaalegar mga pamahog sa ila kabuhi.
Suno sa basketball player, ginhaboy na nila ang pusil matapos ang shooting incident.
Wala pa sang kabug-usan nga statement kag desisyon ang PBA sa status ni Amores bangud nagapadayon pa ang imbestigasyon, apang nagpahayag si PBA commissioner Willie Marcial nga nasubuan gid sila sa nagluntad nga insidente.
Sang 2022, matandaan nga ginpiyestahan man ang pangalan ni Amores bangud estudyante pa lamang ini sa Jose Rizal University (JRU), nangtapungol na ini sang kasumpong nga players halin sa College of St. Benilde rason nga ginkakas sa basketball program sa National Collegiate Athletic Association.
Nagpromisa ini nga magbag-o kag na-draft pa sang NorthPort sa sixth round sang 2023 PBA Draft kag ginhatagan sang playing time nga may shooting guard position.
