ILOILO CITY- Ginpasakaan sang administrative case sa Korte Suprema si Judge Daniel Gerardo Antonio Amular, presiding judge sang Regional Trial Court Branch 35.
Ang mga complainants amo sanday Roel Castro, president kag chief operating officer sang More Electric and Power Corporation kag Atty. Hector Teodiso, legal counsel sang nasambit nga korporasyon.
Sa interview sang Bombo Radyo kay Atty. Teodosio, iya ginpahayag nga ang kaso administratibo nga ila ginpasaka batok kay Amular ang nagalakip sang grave misconduct, gross ignorance of the law, kag violation of the Code of Judicial Ethics.
Suno kay Teodosio, ini may kaangtanan sa nangin aktwasyon, mga tinaga, kag ginpang-isyu nga mga order sa expropriation proceedings nga gin-preside ni Amular sa kaso sang More Electric and Power Corporation kontra sa Panay Electric Company.
Ginpahayag ni Teodosio nga pagkatapos nabaton sang korte suprema ang ila ginpasaka nga kaso, magadepende na sa pinakamataas nga korte ang mangin dalagan sang kaso.
Suno pa kay Teodosio, mahimo nga mag-isyu sang resolusyon ang korte suprema nga i-dismiss ang kaso ukon magpagwa sang order agud pasabton si Amular antes magtalana sang hearing para sa presentasyon sang mga ebidensiya ukon position paper.
Apang ginpahayag ni Teodosio nga bangud integridad sang huwes ang ila ginakwestiyon, mahimo nga mangin madasig ang dalagan sang kaso.
