Gin-aresto ang 43-anyos nga American singer-songwriter nga si Justin Timberlake bangud sa pagmaneho apisar hubog sa New York sa Estados Unidos sang Amerika.
Base sa pahayag sang local district attorney’s office sang Sag Harbor, nadakpan ang singer sa Long Island matapos nga wala sini ginsunod ang “stop” sign kag duha ka beses nga nagsaylo sang lane.
Tatlo ka beses man sini nga ginpangindian ang chemical test apang maathag suno sa pulis nga nagapanimaho na ini sang ilimnon sang ginparahan sang pulis pasado 12:00 sa kagab-ihon.
Sunod nga nagguluwa ang mga impormasyon nga hubog na si Timberlake antes ini nagguwa sa party malapit sa area kun sa diin siya nadakpan.
Ginpabilin ini sa kustodiya sang pulis sa amo nga gab-i apang ginpaguwa man pagkasunod nga adlaw. Natalana ang iya pag-atubang sa korte sa Hulyo 26.
Nahibaluan nga on tour subong ang pop singer sa iya album nga “Everything I Thought It Was.” Sa weekend, natalana ang concert sini sa Chicago kag may duha ka shows sa New York City sa masunod nga semana.
