Nagpangabay ang Philippine National Oil Company (PNOC) sang ₱8 bilyon nga dugang nga budget sa Kongreso agud makabakal sang dugang nga suplay sang krudo kag mapabakod ang reserba sang enerhiya sang pungsod.
Ang pondo nagikan sa internal funds sini kag ginalauman nga mangin self-sustaining system agud makaresponde gilayon ang gobyerno sa kakulangon sang suplay nga wala na nagasalig sa temporaryo nga pondo.
Ini nga tikang nagasunod sa ginpatuman nga emergency fuel procurement program sang Department of Energy matapos gindeklara ni President Ferdinand R. Marcos Jr. ang national emergency bangod sa mataas nga presyo sang langis.
Sa subong, ginabulubanta nga good for 50 days na lang ang fuel supply sang Pilipinas, samtang ginaplanuhan pa ang pagbakal sang dugang nga duha ka milyon ka bariles sang krudo.
Ginrekomendar man sang PNOC ang “phased approach” sa pagpa-uswag sang reserba agud indi na mabudlayan ang gobyerno amo man ang publiko.
