Wala pa sang kumpirmasyon halin sa Gilas Pilipinas apang daku ang paglaum nga makahampang si Kai Sotto sa semifinals sang FIBA Olympic Qualifying Tournament kasunod sang pagpa-check sini sa ospital bangud sa insidente nga natabo sa hampang sang national team batok sa Georgia.
Sa 6:42-mark sang ikaduha nga quarter sa Riga Arena sa Latvia sang Huwebes sang gab-i, natumba kag napintalan si Sotto sang Georgian star nga si Goga Bitadze kag wala na nakabalik pa sa hampang.
Kasunod sang pagbisita sa ospital, nakumpirma nga wala sang rib fracture si Sotto kag wala man sang injuries sa internal organs ukon sa parte sang iya lawas nga nagsalo gid sa bug-at ni Bitadze.
Ginpahayag nga indi na tuman ka budlay para sa 7-foot-3 center sang Gilas nga maghulag subong apang bilang kabahin sang treatment plan, ginpasuksok ini sang patch kag protective compression wear nga may hex foam pads. Mismo si Sotto ang nagsiling nga nagalaum siya sa “Milagro” para maka-upod siya sa Gilas sa masunod nga hampang.
Matandaan nga nagpangaduha si Sotto kay Justin Brownlee sa pinakamataas nga puntos sa 89-80 nga maragtason nga pagdaog sang Pilipinas batok sa world no. 6 nga Latvia sa opening match sa Olympic qualifiers.
18 puntos kag walo ka rebounds ang nabubo sini batok sa European squad, apang sa hampang batok sa Georgia, yara lamang sa 4 points kag 2 blocks ang iya nahimo bangud sa 11 minutos lamang kag 49 segundos nga pagtinir sini sa sambuwa.
Nahibaluan nga duha ka daog na lang ang kinahanglan sang underdog nga Gilas agud nga maka-qualify ini para sa Paris Olympics.
8:30 karon sa gab-i atubangon sang national team sa semifinal match ang Group B top seed kag world No. 12 nga Brazil.
Nakasulod ang Brazil sa semis paagi sa 82-71 nga kadalag-an batok sa world No. 17 Montenegro nga ginpangunahan sang two-time NBA All Star nga siNikola Vucevic. Sa ikaduha naman nga hampang, ginlutos sang Brazil ang Cameroon sa tatlo gid lamang ka puntos, 77-74.
Siyam sa mga players sang Brazil ang kabahin anay sang squad nga nakalab-ot sa second round kag nagtapos nga pang-13 sa 2023 FIBA World Cup.
