ILOILO CITY – Nagsamo sang luha kag kakulba sang misis sang Ilonggo seaman nga nadala sa paglugdang sang livestock ship bangud sa Bagyo Maysak sa baybayon sang Amami Oshima island sa Japan.
Ini matapos ginkansela sang Japanese Coast Guard ang rescue operation agud makita ang naglugdang nga barko bangud sa bagyo Haishen.
Nahibaluan nga sakay sang 11,947-ton Gulf Livestock 1 cargo vessel ang 43 ka mga crew sa diin 39 ang mga pinoy, 2 ang New Zealander kag 2 ang Australian.
Sakay man sang nasambit nga barko ang 5,800 ka mga baka nga naghalin sa New Zealand kag dal-on sa China sa diin kalabanan sa mga ini ang nagabusong pa.
Sa interview sang Bombo Radyo kay Luna Mae Gallardo sang Brgy. Malunang Zarraga, Iloilo, iya ginpahayag nga tuman ang iya paglalain bangud wala sa gihapon makit-an ang iya bana.
Suno kay Gallardo, wala siya nagakadulaan sang paglaom nga makita sa gihapon ang iya bana.
Ginpahayag sang natungdan nga ang iya na lang nga ginahimo amo ang pagpangamuyo sa Diyos nga malampusan ang nasambit nga pagtilaw sa ila kabuhi.
“Magpakabakod lang gid siya. Kun diin man siya subong, tani safe lang siya kag tano makapuli lang siya diri.”
Nahibaluan nga natalana nga magbata si Gallardo sa Setyembre 8.
