ILOILO – Ginpatigayon ang programa nga Kape kag Isyu sa probinsya sang Guimaras kun sa diin gin-istoryahan ang pila ka mga isyu sang kada banwa.
Ang Kape kag Isyu nga programa ang gintambungan sang nagkalain-lain nga opisyal sang sa banwa sang San Lorenzo, Guimaras.
Sa interview sang Bombo Radyo kay Mayor Nimfa Gajo, iya ginpahayag nga tuman ang ila kalipay bangud ang ila nga banwa ang ika una nga ginpatigayunan sang nasambit nga programa.
Suno kay Gajo, dako ang bulig sang nasambit nga programa bangud nasabat ang palamangkutanon sang tanan barangay officials tuhoy sa mas ginpasangkad pagdumala sa ila lugar.
Ginpahayag ni Gajo nga katuyuan sang nasambit nga programa nga mas pabaskugon ang koneksyon sang tanan nga mga opisyal para sa mas masangkad nga serbisyo para sa pumuluyo.
Samtang suno naman kay Police Colonel Hector Maestral, direktor sang Guimaras Police Provinical office, isa man ka maayo nga kahigayunan para sa mga pulis ang paghiwat sang nasambit nga programa.
Natalana naman nga patigayunon ang nasambit nga programa sa iban pa nga banwa sa probinsya sang Guimaras.
