Wala sang pyansa sa kaso nga gin-file sang Office of the Ombudsman batok kay former Ako Bicol representative Zaldy Co kaangot sa mga anomaliya sa flood control project sa Oriental Mindoro.
Kahapon sang ginpasaka ang kaso sa Sandiganbayan batok kay Co, mga opisyal sang Department of Public Works and Highways (DPWH) Region 4-B, kag board directors sang Sunwest Corp. bilang private respondents.
Ang sampaw-sampaw nga mga kaso amo ang malversation of public funds paagi sa falsification sang public documents, violation sang Section 3E sang Anti-Graft and Corrupt Practices Act, kag para kay Co – violation sang Sec. 3H sang RA 3019 bangud sa pagbaton sang unwarranted financial ukon pecuniary benefits.
Suno kay Ombudsman spokesperson Mico Clavano, wala sang pyansa nga ginrekomendar ang prosecution sa kaso nga malversation bangud lapaw sa P8.8-million ang kantidad.
Ang malversation amo ang krimen nga ginkomiter sang isa ka public officer nga nag-benepisyo ukon siya mismo ang nag-misappropriate sang public funds.
Ini ang una nga kaso nga nakalab-ot sa korte halin sang naglupok ang isyu sa flood control scam. Ang iban nga legal actions amo ang mga rekomendasyon halin sa Independent Commission for Infrastructure (ICI) ukon ang mga reklamo nga pending sa Ombudsman kag sa Department of Justice (DOJ).
Matandaan nga sang nagligad nga semana, nagpahayag si President Ferdinand Marcos Jr. nga madamo nga personalidad nga naangot sa flood control corruption ang mapreso antes ang Paskuwa.
