Nagnubo sang 34% ang kaso sang fireworks-related injuries (FWRI) sa tuig 2025 sa probinsya sang Iloilo kun ikumpara sa tuig 2024.
Sa interview sang Bombo Radyo kay Dr. Rodney Labis, Chief sang Health Service Delivery Division sang Iloilo Provincial Health Office (IPHO) iya ginpahayag nga may 28 ka bag-o nga kaso nga narekord halin New Year’s Eve tubtob nga una ka adlaw sang Enero,
Samtang 52 ka kaso naman ang narekord humalin December 21 tubtob sa katapusan sang tuig.
Sa kabug-usan, 27 ka banwa sa probinsya sang Iloilo ang may narekord nga mga kaso.
Pinakadamo nga kaso ang narekord sa Sara nga may ara sang 5 ka kaso, samtang 4 ka kaso ang narekord sa Sta. Barbara kag Pototan.
Base sa regional data, ang pinakadamo nga biktima sang FWRI amo ang naga-edad 10–19 anyos, kag kalabanan ang mga lalaki. Samtang, 9% naman ang sa kababainhan.
Ginpahayag man nga illegal nga boga kag kamara ang ginhalinan sang kadam-an nga mga injury.
Ginpahanumdom sang IPHO nga posible pa nga madugangan ang ini nga mga kaso bangud sa Enero 6 pa matapos ang surveillance period.
Nagpasalamat naman ang Provincial Government sang Iloilo sa tanan nga nagsuporta sa kampanya nga “Iwas Paputok”, nga ginakabig nga isa sa mga rason sa pagnubo sang kaso sang fireworks-related injuries sa probinsya.
