Suspendido ang klase sa tanan nga lebel sa pampubliko kag pribado nga mga eskwelahan sa syudad sang Iloilo buwas, Pebrero 6.
Sandig ini sa gin-anunsyo ni Iloilo City Mayor Raisa Treñas subong nga gab-i agud maproteksyunan ang mga kabataan sa mangin epekto ni Bagyo Basyang.
“To ensure the safety sang pinalangga naton nga mga estudyante, face to face classes are suspended tomorrow, February 6, 2026 and shift to Alternative Delivery Mode, on All Levels in Public and Private schools in Iloilo City,” kabahin sang anunsyo sang alcalde.
Sa 8:00 weather bulletin sang PAGASA, nakasaad nga napasaka sa Tropical Cyclone Wind Signal No. 1 ang bilog nga Western Visayas ukon ang Guimaras, Iloilo, Capiz, Aklan, kag Antique.
Ulihi nakit-an ang sentro sang bagyo sa kalayuon nga 115 km nasidlangan sang Hinatuan, Surigao del Sur. Dala sini ang kabaskugon sang hangin nga 75 km/h malapit sa sentro kag pagmadlos nga tubtub sa 90 km/h.
Nagahulag ang bagyo sa direksyon nga pa-nakatundan naaminhan-nakatundan sa kadasigon nga 20 km/h.
Sa forecast track, maga-landfall ang sentro sang bagyo sa Surigao del Sur subong nga kagab-ihon ukon buwas sa kaagahon.
Matapos makatabok sa Mindanao, magatuhaw ini sa Bohol Sea buwas sa aga kag maglabay malapit (ukon mag-landfall) sa Siquijor kag sa southern portion sang Negros Oriental sa buwas sang hapon ukon sa gab-i.
Sa buwas sang gab-i ukon sa Sabado sang kaagahon, magatuhaw ini sa Sulu Sea, kag magalaslas sa northern portion sang Palawan sa Sabado sang hapon tubtub sa gab-i.
Ginalantaw nga magahina ini kag mahimo nga low pressure area sa Sabado sang hapon ukon sa gab-i.
