ILOILO CITY – Lunsay nangin topnotchers ang duha ka mag-classmates sa West Visayas State University sa March 2023 Licensure Examination for Teachers.
Ini matapos nakuha ni Jirah Mae Gabo Flores ang Top 3 nga may score nga 92.40%, samtang, nakuha naman ni Chris John Quintila Ludas ang Top 10 nga may score nga 91%.
Nahibaluan nga lunsay ginkuha sang duha ang kurso nga Bachelor of Secondary Education Major in Science sa West Visayas State University.
Sa interview sang Bombo Radyo kay Flores nga tumandok sang probinsya sang Guimaras, iya ginpahayag nga dako ang impluwensiya sang iya mga ginikanan nga lunsay mga manunudlo agud magkuha sang kaangay man nga kurso.
Suno kay Flores, gamay pa lang ini, nagahandom na ini nga mangin isa ka teacher, gani dako gid ang iya kalipay matapos nga nakapasar sa pasinawan.
Ginpahayag dugang sang natungdan nga matapos mapasaran ang pasinawan, nagaplano ini nga magtudlo sa iya anay nga eskwelahan kag magkuha sang Masters in Education.
Sa subong, nagatrabaho na bilang teacher si Flores sa isa ka private school sa probinsya sang Guimaras.
Samtang, wala gid ginhandom ni Ludas nga mangin isa ka manunudlo bangud kun ini gani ang pamangkuton kun ano iya luyag magdako, ang masami ginasabat sini amo ang mangin isa ka seafarer ukon piloto.
Sa interview sang Bombo Radyo kay Ludas, iya ginpahayag nga sang nakatungtong na ini sa hamtong nga edad, nawili ini sa pagbasa kag pagtuon kun sa diin naluyagan na niya ang pagtudlo.
Diri na kag ginpadayon niya ang pagkuha sang kurso nga education sa kolehiyo.
Ginpahayag dugang sang natungdan nga ginkakibot sini ang resulta kun sa diin tuman nga kasadya ang iya nabatyagan.
Sa subong, nagatudlo na sa isa ka pribado nga eskwelahan si Ludas kag nagaplano nga magkuha sang Masters in Education.
