ILOILO – Indi pa gihapon maaprubahan sang Office of the Civil Defense (OCD) Region 6 ang maritime task force bangod sang ginapahayag problema sa komunikasyon.
Sa interview sang Bombo Radyo kay OCD Regional Director Jose Roberto Nunez, iya partikular nga gintumod ang paggamit sang hand held radio.
Suno kay Nuñez, may yara kuntani sang ginhatag ang National Telecommunications Communication nga frequency apang indi pwede magamit tungod indi pwede nga makalab-ot sa iban nga ahensya nga may yara sang iban nga brand.
Ang Department of Information and Communications Technology kuntani suno kay Nuñez ang dapat nga mag-supply sang communication links sa tagsa ka ahensya.
Dugang pa ni Nunez, indi mahapos ang komuikasyon sa tion sang kalamidad ilabi na sa tion sang brownout kag wala na sang cellphone nga mahimo gamiton.
Sa subong, suno sa natungdan, dapat anay nga i-address sang mga Local Government Unit (LGU) ang tanan nga mga problema ilabi na sa rescue operation.
Kinahanglan man suno kay Nuñez nga may yara sang port-to-port responders kag ang mga barangay nga malapit sa coastal areas ang may yara sang manami nga communication.
Ang report naman nga isubmit sang tanan nga miyembro sang task force ang batunon sang technical working committee sa amo nga pamunuan kag i-address ang tanan nga mga kinahanglanon.
Samtang, may kaangtanan naman sa Philippine Coast Guard (PCG), suno kay Nunez, may yara pa sila sang dapat nga pauswagon ilabi na sa ‘response.’
Dapat suno kay Nuñez nga may yara sang dalagku nga rescue boats ang PCG.
Iya man ginhangkat ang probinsya sang Guimaras nga magbakal sang mga sakayan pandagat nga pwede maka-transport sang ambulansya kag mga daku nga mga equipment.
